Edhe të vaksinuarit infektohen por shumë pak prej tyre përfundojnë në spital

Vaksinimi nuk ofron mbrojtje absolute. Por ata që infektohen duke qenë të vaksinuar vuajnë nga simptoma më të buta ose fare pa simptoma

Gjatë korrikut, një numër më i madh njerëzish u desh të shkonin në spital për shkak të  infeksionit me koronavirus. Por, shumica e madhe e tyre nuk ishin të vaksinuar, ose kishin marrë vetëm njërën vaksinë, siç tregojnë të dhënat e fundit të BAG, shkruan watson.ch.

Ky është një tregues i qartë për atë se sa mirë është duke funksionuar vaksinimi

Që nga shkurti i këtij viti, sipas të dhënave të BAG, rreth 7,000 njerëzve u është dashur të shtrohen në spital për shkak të rrjedhës së rëndë të sëmundjes në lidhje me koronavirusin. Por, vetëm 100 prej tyre ishin të vaksinuar, trasnmeton albinfo.ch.

Shikuar në përgjithësi, ky duket të jetë një sukses i madh. Por megjithatë shifrat duhet të relativizohen sepse shumë pak veta ishin të vaksinuar (plotësisht) në fillimin e këtij viti dhe, në përputhje me rrethanat, nuk mund të regjistroheshin në statistikat e të vaksinuarve.

Nga ana tjetër, nëse përqendrohemi në javët që nga fillimi i korrikut, teza e mësipërme konfirmohet në tërësi: Nga 343 persona të shtruar në spital, të infektuar me Covid, 21 ishin plotësisht të vaksinuar, transmeton albinfo.ch. Kjo është rreth gjashtë për qind në një kohë kur afër 50 % e popullsisë ka marrë vaksinën.

BAG thekson se shifrat duhet të trajtohen me kujdes. Nga njëra anë, procesi i raportimit është ende duke u konsoliduar, nga ana tjetër, në numrin e rasteve të infeksionit dyshohet për një numër të konsiderueshëm të rasteve të pa raportuara.

Sidoqoftë, shifrat e para nga Zvicra dhe ato nga jashtë tregojnë qartë se vaksinimi jep atë që ishte premtuar: Pra, vaksinimi nuk ofron mbrojtje absolute kundër infeksionit me koronavirus, përcjell albinfo.ch. Por ata që janë të infektuar duke qenë të vaksinuar do të vuajnë nga simptoma më të buta ose fare pa simptoma.

---