Kapet çifti shqiptar në Gjermani duke sjellë çokollata me kanabis nga Holanda

Në kontrollin kufitar pranë Holandës, një copë çokollatë, biskota dhe çamçakëz ishin fatale për një çift shqiptar: Ato përmbanin kanabis

Pak çokollatë dehëse ishte fatale për një çift nga Shqipëria: Policia federale ka kontrolluar dyshen të martën në mbrëmje (tre gusht), në një Nissan Micra të regjistruar në Witten në autostradën A3 te Rees, shkruan presseportal.de.

Aty u gjetën: 300 gram biskota kanabis, 100 gram çokollatë kanabisi dhe 17 gram çamçakëz kanabis. Por ky ishte vetëm fillimi .

Gjatë inspektimit, shoferi 31-vjeçar i makinës ka paraqitur pasaportën e tij shqiptare dhe një certifikatë aplikimi për një leje pune në Itali nga viti 2020, transmeton albinfo.ch. Pasagjerja 32-vjeçare ishte në gjendje të tregonte vetëm një leje qëndrimi të vlefshme italiane.

Gjatë kontrollit të automjetit, policia gjeti dy kanaçe me “biskota magjike”, një çokollatë kanabisi dhe një pako çamçakëz kanabis në bagazhin midis veshmbathjeve. Lidhur me origjinën e narkotikëve të ëmbël, udhëtarët kanë deklaruar se i kishin blerë në një supermarket në Holandë.

Të akuzuarit më pas janë dërguar në mbajtje. Inspektorati Policor Federal në Kleve ka nisur me këtë rast dy procedura penale: njërën, për shkelje të përbashkët të Ligjit për Narkotikët ndërsa tjetrën, kundër shoferit për hyrje dhe qëndrim të paligjshëm në territorin federal.

Një kërkesë e bërë nga Policia Federale drejtuar autoriteteve italiane përmes stacionit kufitar Thörl-Maglern ka zbuluar se shoferi nuk ka leje qëndrimi as në Itali, përcjell albinfo.ch. Më pas ai u është dorëzuar autoriteteve holandeze ndërsa gruaja është lejuar të udhëtonte.

(Foto: Bundespolizei, Gjermani)

---