Lidhja Shqiptare në Botë falënderon kryeministrin kroat për ndihmën dhënë të aksidentuarve

"Një fjalë e urtë shqipe thotë: Miku i mirë njihet në ditë të vështirë! Kësaj radhe, për të satën herë e dëshmuat në vepër miqësinë dhe vëllezërinë kroato-shqiptare"

Lidhja Shqiptare në Botë, ka falënderuar Kryeministrin kroat Anrej Plenkoviq për angazhimin e institucioneve të shtetit të tij dhe të popullit kroat në ndihmë qytetarëve të Kosovës që pësuan në aksidentin e rëndë në Kroaci.

Në vazhdim, letra e nënshkruar nga kryetari i LSHB, Nazmi Jakurti dhe ai i LSHB-së për Kroaci, Sahit Tashevci.

Kryeministrit të Republikës së Kroacisë
Shkelqësisë së tij z. Andrej Plenkoviq

Falënderime të përzemërta Qeverisë dhe Popullit fisnik Kroat

I nderuar zotëri Kryeministër i Republikës së Kroacisë
Angazhimi juaj, i të gjitha institucioneve tuaja relevante dhe i qytetarëve kroatë në ndihmë të udhëtarëve kosovarë që pësuan në tragjedinë që ndodhi në afërsi të Slavonski Brod, edhe njëherë, në mënyrën më të mirë shpërfaqi virtytet më të mira që e cilësojnë popullin mik Kroat. Profesionalizmi, efikasiteti, humanizmi, dashamirësia me të cilën u kujdesët dhe vazhdoni të kujdeseni për viktimat e tragjedisë, tek ne e ngritë deri në qiell respektin dhe dashurinë vëllazërore që ndiejmë tradicionalisht për popullin fisnik kroat!
Një fjalë e urtë shqipe thotë: Miku i mirë njihet në ditë të vështirë! Kësaj radhe, për të satën herë e dëshmuat në vepër miqësinë dhe vëllezërinë kroato-shqiptare!

Ne, shqiptarët nga të gjitha anët e botës ju kemi borxh përjetë dhe i lutemi zotit që t’ua kthejmë në gëzime!
Përshëndetje dhe respekt

Nazmi Jakurti, kryetar i Lidhjes Shqiptare në Botë, Simon Kuzhnini, Kryetar Nderi i LSHB dhe Sahit Tashevci, Kryetar i LSHB-Kroaci

 

---