Zvicër: Numri i të sëmurëve në kujdesin intensiv është rritur për 33 për qind

Shtrimet në spital janë rritur në mënyrë të vazhdueshme që nga java e 14 qershorit ndërsa numri i vdekjeve ka mbetur i qëndrueshëm

Në Zvicër dhe Lihtenshtajn, krahas numrit të infeksioneve me koronavirus kohëve të fundit po vjen duke u rritur edhe numri i shtrimeve në spitale. Ky i fundit është rritur nga 48 në 63 raste në javën në mes 19 dhe 25 korrikut, raporton srf.ch.

Ndërkaq një zhvillim shqetësues është rritja aktuale e numrit të njerëzve në njësitë e kujdesit intensiv, transmeton albinfo.ch. Bëhet fjalë për 33 për qind më shumë të shtruar në spitalet e kujdesit intensiv në krahasim me një javë më parë

32 pacientë kanë qenë gjithsej në njësitet e kujdesit intensiv në javën raportuese, siç ka treguar të enjten Buletini i përjavshëm për Koronën, i Zyrës Federale të Shëndetit Publik (BAG).

Mosha mesatare (median) e të gjithë personave që janë në kujdesin spitalor inmtensiv për shkak të Covid është 56 vjeç. Kjo do të thotë se gjysma e tyre ishin më të vjetër, gjysma tjetër ishin më të rinj se 56 vjeç.

Shtrimet në spital janë rritur në mënyrë të vazhdueshme që nga java e 14 qershorit ndërsa numri i vdekjeve ka mbetur i qëndrueshëm,  në një nivel të ulët.

Njerëzit midis moshës 20 dhe 29 vjeç janë infektuar më shpesh, me pothuajse 1,700 raste të reja të raportuara, transmeton albinfo.ch. Më pak nga të gjithë , janë infektuar personat midis 70 dhe 79 vjeç.

---