Koronavirus: Austria në mesin e 5 më të mirëve në Evropë

Austria aktualisht gjendet në vendin e katërt në Evropë për incidencë shtatëditore ndaj koronavirusit. Ajo renditet pas Portugalisë, Britanisë dhe Finlandës, njofton albinfo.at

Numrat e infeksioneve në Austri çdo ditë e më shumë po bien. Dje, vetëm 644 infeksione të reja u raportuan në gjithë Austrinë. Herën e fundit që numrat ishin më të ulët, ishin më 27 shtator 2020, ku kishte 547 raste të reja. Një krahasim tjetër: saktësisht një javë më parë, u raportuan 1,072 persona të infektuar brenda 24 orësh, shkruan oe24.at

Aktualisht 11,151 persona në të gjithë vendin janë të prekur me koronavirus, ndërsa 1,651 më pak se një ditë më parë.

Këto shifra japin shpresë dhe mundësojnë për të bërë hapin drejt hapjes së madhe.

Kufizimet e daljes nga ora 20:00 deri 06:00 të mëngjesit janë shfuqizuar që nga mesnata. Tani, mund të dilni pa asnjë kufizim. Mësimi në shkolla do të filloj prej nesër(e hënë) me orar të plotë dhe për të gjithë nxënësit, ndërkohe kafenetë, restorantet, hotelet, turizmi, kultura dhe sportet do të lejohen nga dita e mërkurë, përcjell albinfo.at

Shumë tregues të tjerë të pandemisë gjithashtu dukshëm po përmirësohen. Incidenca shtatëditore (infeksionet për 100,000 persona brenda një jave) aktualisht është 71.6.  Kjo vlerë ka qenë në një nivel dukshëm më të lartë që nga fillimi i tetorit 2020.  Niveli më i lartë u arrit më 12 nëntor në 564.9.

Po ashtu situata po përmirësohet edhe nëpër spitale. Numri i pacientëve me  Covid -19 në spitale gjithashtu po bie. Të shtunën janë raportuar  973 persona të sëmurë, 321 prej tyre në njësitë e kujdesit intensiv. “Ka dukshëm më pak pacientë të sapo infektuar, të sëmurë rëndë që vijnë në njësitë e kujdesit intensiv”, thotë Thomas Staudinger, kreu i njësisë së kujdesit intensiv në Spitalin e Përgjithshëm të Vjenës.

Sidoqoftë, kryetari i Bashkisë së Vjenës, Michael Ludwig ka kërkuar nga qytetarët e Vjenës të kenë kujdes të shtuar pas hapjes së sektorëve në gjithë Austrinë.

---