Eurodeputeti Mandl punëson në zyrën e tij në Bruksel një student shqiptar nga Austria

Raimond Nrecaj, student i drejtësisë në Graz është punësuar për dy muaj në zyrën e Lukas Mandl në Parlamentin Evropian në Bruksel

Ai nuk rresht së foluri mirë për shqiptarët sa herë që i jepet mundësia. Tash e sa vite, eurodeputeti austriak, Lukas Mandl është zëri i shqiptarëve në Parlamentin Evropian. Sa herë që të hapet tema e Kosovës në Parlamentin Evropian, ai me ngulm kërkon që qytetarët e Kosovës të gëzojnë sa më shpejt të drejtën e liberalizimit të vizave, shkruan albinfo.at.

Por, jo vetëm kaq. Mandl, që është edhe kryetar i Shoqatës “Miqësia Austri – Kosovë” është gjithmonë në kontakt edhe me komunitetin shqiptar në Austri. Lidhja e tij me komunitetin tonë dhe popullin shqiptar në përgjithësi ka bërë që edhe në zyrën e tij në Bruksel t’ia japë mundësinë e punësimit për praktikë një studenti shqiptar.

Raimond Nrecaj, student i drejtësisë në Graz është punësuar për dy muaj në zyrën e Lukas Mandl në Parlamentin Evropian në Bruksel, transmeton albinfo.at postimin e eurodeputetit.

Lajmin bashkë me fotografi e ka shpërndarë vet, miku i shqiptarëve.

„Sot është dita e parë e praktikantit tim më të ri në zyrën, në Bruksel. Raimond Nrecaj studion për drejtësi në Graz dhe është i angazhuar me Federalistët e Rinj Evropianë.

Ekipi im dhe unë do ta mbështesim atë në dy muajt e ardhshëm në Bruksel. Gëzohem shumë, për bashkëpunimin tonë”, shkruan në gjuhën gjermane përbri fotos, eurodeputeti austriak, Lukas Mandl.

 

 

---