Qeveria tregon hapat e zbutjes: A do të hapen tarracat më 22 mars?

Këshilli Federal do të vendosë më 19 mars për hapjen e pritshme të 22 marsit. Por e gjitha varet nga situata epidemiologjike

Nga 22 marsi, në Zvicër mund të priten hapa të mëtejmë drejt zbutjes së masave të koronës. Por këta hapa do të merren gjithmonë në varësi të situatës epidemiologjike.

Lidhur me këtë, Këshilli Federal ka dërguar në kantone për konsultim disa propozime masash në këtë drejtim, shkruan srf.ch.

Nëse situata epidemiologjike lejon, që nga 22 marsi duhet të jenë përsëri të mundshme por me kufizime, aktivitetet me publik, takimet në shtëpi me dhjetë persona si dhe aktivitetet sportive dhe kulturore në grupe.

Ndërkohë, presidenti federal, Guy Parmelin dhe ministri i shëndetësisë, Alain Berset janë duke i prezantuar hapat e propozuar të qeverisë në konferencën për media që po mbahet në Bernë.

Këshilli Federal do të vendosë më 19 mars për këta hapa, transmeton albinfo.ch. Se kur dhe në çfarë forme mund të zhvillohet hapi i dytë i zbutjes së masave është ende e hapur për shkak të situatës së brishtë epidemiologjike.

• Takime private në shtëpi: 10 persona lejohen përsëri brenda me familjen dhe miqtë.
• Ngjarje me një audiencë: jashtë me 150 persona (si për shembull ndeshje futbolli), ndërsa brenda, me 50 persona (kinema). Përveç kësaj, ekziston një kufizim në maksimumin e një të tretës së kapacitetit të objektit ku zhvillohet aktiviteti. Është e detyrueshme ulja dhe mbajtja e maskës.
• Restorantet duhet të jenë në gjendje të hapin përsëri tarracat.
• Sporti dhe kultura: për të rriturit në amatorizëm, gjithashtu, për individë ose për grupe deri në 15 persona. Por gjithsesi duke mbajtur distancë dhe duke vendosur maskën, ​​kur është e mundur.
• Mësimi me prani fizike në universitete duhet të jetë përsëri i mundur, por i kufizuar në grupe prej 15 personash si dhe duke mbajtur maskën dhe distancën.
• Shtëpitë e të moshuarve: Heqja e detyrimit për vënie të maskës për banorët e vaksinuar.
• Ndryshimi i detyrimit të karantinës: Personat e vaksinuar që kanë pasur kontakt me një person që ka rezultuar pozitiv nuk duhet të mbahen në karantinë.
• Këshilli Federal ka vendosur përfundimisht që do të marrë përsipër kostot e të gjitha testeve të shpejta, duke fillluar nga 15 marsi, përfshirë edhe ato të njerëzve asimptomatikë.

 

---