Gjermania vazhdon izolimin deri më 7 mars

Gjermania do të vazhdojë izolimin edhe për një muaj. Qeveria federale dhe ato të republikave kanë vendosur që "bllokimi" në Gjermani të zgjatet deri më 7 mars

Sot gjatë ditës është përfolur për data të ndryshme të zgjatjes së “bllokimit” të Gjermanisë, por tani ka një vendim. “Bllokimi” në Gjermani do të jetë deri më 7 mars, shkruajnë mediat gjermane, përcjell albinfo.ch.

Sallonet e floktarëve do të rihapen më 1 mars, ndërkohë për rihapjen e shkollave dhe kujdesit ditor për fëmijë, u është lënë në dorë shteteve federale të Gjermanisë të vendosin vetë për këto çështje.

Kancelarja Angela Merkel e ka përshkruar periudhën deri në mes të marsit si “ekzistenciale” për zhvillimin e mëtejshëm të pandemisë së koronavirusit në Gjermani për shkak të rrezikut të paraqitur nga mutantët e ri të virusit, transmeton albinfo.ch.

Kancelarja Merkel ka thënë se janë duke përdorur modele të ndryshme për t’i mënjanuar viruset por, siç ka thënë ajo të mërkurën, ekziston rreziku i një vale të tretë, të cilës masat politike duhet t’i kundërvihen.

 

---