Pandemia boshatis Venecian, anulohen edhe festa të tjera

Ishte në ditë si këto, kur pandemia nuk kishte rënë ende, që turma të mëdha njerëzish mblidheshin për të shijuar karnavalet më të famshme në botë.

Venecia ishte aq e populluar sa nuk mbetej centimetër katror i lirë për këdo që donte t’i bashkohej festës.

Por që nga rënia e pandemisë në Itali, fillimisht në rajonin e Lombardisë dhe më pas edhe në atë të Venetos, situata ka ndryshuar dhe qyteti i karnavaleve nuk është më i njëjti.

Sot, në ditën zyrtare të festës, askush nuk ndodhet në rrugë dhe mungojnë shenjat e gëzimit dhe maskimit, shkruan Euronews, përcjell Albinfo.ch.

Edhe pse eventi nuk është anuluar tërësisht, të shtunën nuk nisi asnjë aktivitet dhe gjithçka është tkurrur në takime virtuale që do të fillojnë javën e ardhshme.

E njëjta gjë do të ndodhë edhe me shumë evente të tjera, si karnavalet në Këln të Gjermanisë, një nga festat kryesore të Evropës, që është anuluar.

Po ashtu, e famshmja e Marta e Madhe në Nju Orlins do të kalojë pa paradën e zakonshme.

Megjithatë, që në nëntor, kur u bë e qartë se do të ishte një e martë e zymtë, një shoqatë nisi t’u bënte thirrje njerëzve që të angazhoheshin në mënyrë që rrugët të gjallëroheshin gjithsesi. Kështu, rreth 9 mijë shtëpi janë dekoruar. Në tërësi do të jetë një festë statike, por në një farë mënyre do të ketë edhe lëvizje.