Shqipëria e ndihmoi Kroacinë me 250 mijë euro

Keystone

Në një njoftim të fundit nga kryeministri i Shqipërisë, Edi Rama, bërë të ditur se 250 mijë euro do të shkojnë për Kroacinë, e cila të martën u godit nga një tërmet shkatërrues, transmeton albinfo.ch.

Ai tha se ka nënshkruar dekretin për donacion, për të ndihmuar “rilindjen e Petrinjës”, qytetit me pasojat më të mëdha.

“Kroacia është një shembull i rezistencës dhe një rol model për ne, sa i përket transformimit të saj të mahnitshëm në një vend krenar të BE-së”, shkroi Rama në Twitter.

Duhet theksuar se tërmeti i së martës në Kroaci ka pasur fuqinë e 6.3 shkallëve të Richterit, ndërsa epiqendra e tij ka qenë tri kilometra larg Petrinjës.

Së paku shtatë persona janë konfirmuar të vdekur, ndërsa ekipet e shpëtimit janë duke vazhduar kërkimet për të mbijetuar të mundshëm nën rrënoja.

Më herët, edhe kryeministri në detyrë i Kosovës, Avdullah Hoti, i ofroi Kroacisë mbështetjen e Forcës së Sigurisë së Kosovës në tejkalimin e pasojave të tërmetit.

Dridhje toke ka pasur edhe sot në Kroaci, ndërsa Qeveria e vendit ka shpallur 2 janarin ditë zie.