Kurz paralajmëron ‘valë të tretë’ të koronavirusit

Kancelari austriak, Sebastian Kurz, ka paralajmëruar se Austria do të përballet edhe më një “valë të vështirë” të koronavirusit në fillim të vitit 2021.

Pas një konference të zhvilluar të premten në mbrëmje me kryetarët e landeve të Austrisë, Qeveria austriake shtrëngoi masat ndaj koronavirusit rreth festës së Krishtlindjes dhe Vitit të Ri, shkruan heute.at
Sipas kancelarti Kurz, natën dhe ditën e festës së Krishtlindjes (24 dhjetor në mbrëmje dhe 25 dhjetor) do të lejohet të festohet në grupe të vogla deri në maksimum 10 persona, përcjell Albinfo Austria.
Nga data 26 dhjetor do të zbatohet përsëri kufizimi i daljes dhe kufizimet e kontaktit me persona të shumtë.
Në natën e Vitit të Ri, ora e kufizimit të daljes do të lejohet nga ora 22.00 – 06.00 të mëngjesit, por kufizimet e kontaktit me persona të ndryshëm do të mbesin në fuqi. Gjatë natës së Vitit të Ri, më 31 dhjetor, do të mund të takohen maksimum dy familje, transmeton Albinfo Austria.
Kancelari Kurz e ka bërë të qartë se “bllokimi” kishte treguar efektin e vet, por shifrat ditore të të infektuarve janë ende të larta.

Pas Vitit të Ri, përkeqësim i situatës

Shefi i Qeverisë austriake ka deklaruar se pret që situata e koronavirusit të përkeqësohet përsëri pas festës së Vitit të Ri. Ai paralajmëron edhe valën e tretë. “Ne, jemi duke lëvizur në drejtim të duhur, por jemi ende larg lehtësimit të përgjithshëm”, ka thënë Kurz.
Thënë shkurt: “Unë pres që ne do të duhet të bëjmë një përpjekje që vala e tretë të mos na godasë fort në fillim të janarit. Në muajt janar, shkurt dhe mars, Austria do të përballet edhe më një “valë të vështirë”, ka paralajmëruar Kurz, përcjell Albinfo Austria.

Raundi i dytë i testeve masive në Austri

Nga 8 deri më 10 janar në lande të Austrisë, (në Vjenë deri më 17 janar) do të vazhdohet raundi i dytë i testit masive të koronavirusit. Në konferencën për shtyp, Kancelari Kurz dhe zëvendëskancelari Werner Kogler edhe një herë i bënë thirrje popullatës që të marrin pjesë në testet masive.

Mbi 3 milionë testime në Austri

Mbi 3 milionë testime janë kryer në Austri që nga fillimi i pandemisë. Të dhënat e fundit tregojnë se ky shtet që nga fillimi i pandemisë e deri tani ka bërë 3,386,308 testime gjithë popullatës austriake, transmeton albinfo.ch.
Nga numri total i testimeve, 319,822 persona kanë dalë të infektuar me koronavirus.

---