Austriaku Lukas Mandl: Evropa të mbajë premtimin, Kosova meriton liberalizimin

Eurodeputeti austriak, Lukas Mandl, ka folur sërish në lidhje me liberalizimin e vizave për Kosovën dhe ka kërkuar që pesë shtetet anëtare të Bashkimit Evropian të njohin sa më shpejt shtetin e Kosovës. Po ashtu ai ka përmendur edhe sfidat më të cilat ballafaqohet shteti më i ri i Evropës. Një nga sfidat aktuale, sipas tij, është zgjedhja e presidentit të ri. Ai ka kërkuar që presidenti i ri të zgjedhet në bashkëbisedim me partitë politike në Kosovë dhe jo të shkohet në zgjedhje të reja.

Deputeti i Parlamentit Evropian, Lukas Mandl, ka thënë se Republika e Kosovës është shteti më i ri në Evropë dhe nuk ka dyshim se i duhet ende të përballet me sfida të ndryshme në rrugën për t’u bërë pjesë e Bashkimit Evropian, sidomos duhet të përmirësohet sundimi i ligjit dhe lufta kundër korrupsionit, shkruan ots.at, përcjell Albinfo Austria.

Por, siç thotë ai, shteti i cili u formua në vitin 2008, ka bërë përparim të konsiderueshëm në përmbushjen e të gjitha kritereve për liberalizimin e vizave. “Disa shtete anëtare të BE-së ende bllokojnë liberalizimin e vizave për kosovarët, e cila u rekomandua nga Komisioni dhe u vendos nga Parlamenti Evropian. Si rezultat, kosovarët në Ballkanin Perëndimor ende nuk kanë liri për të udhëtuar. Dhe një ekonomi që tashmë po e ka të vështirë për rimëkëmbje, është ngarkuar me tarifa të panevojshme për viza”, thotë Lukas Mandl, njëherësh kryetar i shoqatës së Miqësisë Austri – Kosovë.

Popullsia kosovare është mesatarisht më e reja në Evropë. “Shumica e të rinjve atje janë të uritur për arsim dhe për të punuar. Fushat e zhvillimit të softuerit dhe inxhinierisë së softuerit në veçanti mund të japin një kontribut të rëndësishëm në forcimin e ekonomisë. Në planin afatgjatë, Kosova madje mund të bëhet një lloj” Silicon Valley” në Evropë”, thotë Mandl.

 

Kosova të zgjedhë presidentin, pa shkuar në zgjedhje

Të enjten, Komiteti i Politikës së Jashtme fillon negociatat mbi pozicionin e Parlamentit Evropian për Republikën e Kosovës dhe rrugën e saj drejt Bashkimit Evropian. “Për të gjashtë shtetet e Ballkanit Perëndimor, përfshirë Republikën e Kosovës, duhet të ketë reforma të qëndrueshme – veçanërisht në fushat e drejtësisë, sundimit të ligjit dhe luftës kundër korrupsionit”, ka thënë Mandl, transmeton Albinfo Austria.

Një parakusht i rëndësishëm, sipas tij, për një rrugë të mirë reforme, është stabiliteti politik. Mandl ka thënë se aktualisht Kosova ka një sfidë para vetës që është zgjedhja e presidentit të ri. “Kjo duhet të bëhet me marrëveshje mes partive politike dhe pa zgjedhje të reja parlamentare. Zgjedhjet e reja do t’i kushtojnë Kosovës kohë të vlefshme, i shpenzojnë forcë dhe energji. Në anën tjetër, BE-ja duhet ta mbajë premtimin e saj dhe të japë liberalizimin e vizave”, thotë Mandl.

Eurodeputeti austriak që është nga partia ÖVP e Sebastian Kurz u ka bërë thirrje edhe pesë shteteve, anëtare të BE-së që ta njohin sa më shpejt shtetin e Kosovës. Po ashtu ai ka përshëndetur edhe vazhdimin e dialogun mes Kosovës dhe Serbisë. “Fundja, ne si BE jemi përgjegjës për gjithë territorin Evropian dhe nuk guxojmë të lejojmë që pjesë të tjera të botës që nuk ndajnë vlerat tona, të përpiqen të fitojnë gjithnjë e më shumë ndikim në Ballkanin Perëndimor”, ka përfunduar eurodeputeti austriak, Lukas Mandl.

---