Biden drejt fitores, ngushton epërsinë e Trumpit edhe në Georgia

Keystone (AP Photo/Andrew Harnik).Joe Biden

Rrugët drejt fitores mbeten në garën presidenciale të SHBA-së si për Donald Trump, ashtu edhe për Joe Biden, por Biden ka më shumë gjasa për të fituar, përcjell albinfo.ch.

Sipas raportit të The Guardian, Biden kryeson me numrin e votave të Kolegjit elektoral 264-214, pasi ai u shpall fitues në Michigan dhe Wisconsin të mërkurën dhe Trump fitoi një votë në Maine.

Shtimi i Alaskës për Trumpin – votat e së cilës nuk janë deklaruar, por ku rezultati nuk është në dyshim – i jep presidentit 217 vota elektorale.

Dhe, ndërsa afrohej mbrëmja e së mërkurës në SHBA, katër shtete mbetën të deklarohen: Nevada, Karolina e Veriut, Georgia dhe Pensilvania.

Nga ana tjetër, prej fillimit të numërimit, Partia Republikane e presidentit të tanishëm ka qenë në epërsi në Georgia, por dallimi në vota mes kandidatëve tash nuk është aq i madh.

Ky dallim ishte dhjetëra-mijëra vota, ndërsa tani epërsia e Trumpit ndaj Bidenit në këtë shtet është vetëm rreth 23 mijë vota, sipas të dhënave të televizionit CNN.

Rrugët e Trumpit

Që Trump të gjejë 53 votat elektorale që i duhen, ai do të duhet të fitojë Pensilvanian, plus të tre shtetet e tjera.

Por pasi një pjesë e madhe e votave demokratike mbetet të arrihet në Filadelfia dhe Pittsburgh, do të thotë se Trump mund të ketë vështirësi.

Rrugët e Bidenit

Biden ka më shumë rrugë për të siguruar gjashtë votat e tij të mbetura elektorale. Një rrugë qëndron përmes Pensilvanisë, nga e cila do të fitonte 20 vota.

Pa Pensilvanian, Biden mund të fitonte në Nevada, ku ai mbajti një epërsi të qartë, por të ngushtë.

Një fitore e Biden në secilin prej dy shteteve – Georgia ose Carolina e Veriut – pothuajse me siguri do të thoshte edhe një fitore e përgjithshme për Biden. /Albinfo.ch