Evropa në prag të hapjes së shkollave

Gjithashtu edhe shkencëtarët britanikë shprehen në favor të rikthimit të nxënësve në klasa

Qeveritë evropiane po përgatiten të rihapin shkollat në ditët në vazhdim për vitin e ri akademik, ndërsa ekspertët e shëndetësisë thonë se është jetike që fëmijët të rifillojnë arsimimin.

Shumë nxënës nuk kanë qenë në shkollë për gjashtë muaj, pas mbylljeve që filluan në mars për të frenuar përhapjen e koronavirusit.

Disa sindikata mësuesish kanë shprehur shqetësimin për sigurinë e personelit, ndërsa numri i infeksioneve vazhdon të rritet në kontinentin evropian. Kryeministri britanik njoftoi për rihapjen e shkollave. “Shkollat janë të sigurta dhe është fantastike të shohim rikthimin e nxënësve”, tha ai.

Gjithashtu edhe shkencëtarët britanikë shprehen në favor të rikthimit të nxënësve në klasa.

“Shanset që fëmijët të preken nga COVID-i dhe si rezultat të kenë probleme serioze afatgjata, të lidhura me kthimin në shkollë, janë jashtëzakonisht të vogla. Të dhënat se mosshkuarja në shkollë shkakton dëme afatgjata tek fëmijët, janë shumë të qarta dhe kjo përfshin perspektivën e tyre afatgjatë”, thotë Chris Whitty, zyrtari më i lartë shëndetësor në Britani, raporton Zëri i Amerikës, përcjell albinfo.ch.

Britania, ndryshoi qëndrim këtë javë, duke thënë se të gjithë nxënësit e shkollave të mesme duhet të vënë maska në ambjentet e përbashkëta, por jo në klasa.

Një rregull i ngjashëm do të zbatohet në Francë, ku të gjithë të rriturit dhe nxënësit nga klasa e gjashtë e lart, duhet të mbajnë maska.

Italia po e bazon politikën e rihapjes së shkollave, tek testimet për mësuesit dhe nxënësit.

“Është e qartë se në rastet kur ke grupe të mëdha të infektuara, do duhet të mbyllet shkolla nëse është e nevojshme, ose vetëm klasa e prekur, ose fëmijët do të qëndrojnë në shtëpi”, tha Pierpaolo Sileri, Zëvendës ministër Italian i shëndetësisë.

Javën e kaluar, Spanja regjistroi numrin më të lartë të infeksioneve, që nga kulmi i pandemisë. Megjithatë numri i vdekjeve vazhdon të mbetet shumë më i ulët. Qeveria thotë se rihapja e shkollave është përparësi.

“Është detyrimi ynë ndaj nënave, baballarëve, nxënësve, djemve dhe vazjave tona, mësuesve dhe personelit, që ta bëjmë një gjë të tillë në një ambjent të sigurt”, tha kryeministri Pedro Sanchez.

Shumë nxënës do të marrin mësimet e para formale, pas gjashtë muajsh. Ekspertët e shëndetësisë thonë se është jetike që fëmijët të kthehen në klasa që janë të sigurta si për nxënësit edhe mësuesit.

“Të dhënat tregojnë se shkalla e transmetimit të virusit, është në fakt më e lartë mes mësuesve. Prandaj na duhet të marrim masat t’i mbrojmë mësuesit dhe nxënësit, sepse po hyjmë në një krizë globale arsimore, me mbi një miliardë fëmijë jashtë shkollave”, thotë Oksana Pyzik, eksperte e shëndetit public në Kolegjin Universitar në Londër.

Pushimet verore pothuajse kanë mbaruar. Dhe në gjithë Evropën ka nervozizëm, ndërsa numri i infeksioneve rritet, pikërisht kur shkollat dhe shumë zyra bëhen gati të hapen.

---