Lajme

Kosova, medaljen e argjendtë dhe të bronztë në Olimpiadën Matematike Ndërkombëtare

E enjte, 30 Korrik 2020 - 18:35 albinfo.ch

Një medalje të argjendtë dhe një të bronztë e kanë fituar studentët e Kosovës në Olimpiadën Matematike Ndërkombëtare për Studentë- IMC 2020.

Siç është bërë e ditur nga Shoqata e Matematikanëve të Kosovës përmes një njoftimi për media, kjo garë është mbajtur virtualisht për shkak të pandemisë Covid-19.

“Studenti i Departamentit të Matematikës në Universitetin e Prishtinës, Fiton Hoxha, ka fituar Çmim të Dytë (Medalje të Argjendtë) me 25 pikë, ndërsa studenti tjetër i Departamentit të Matematikës, Erion Hamiti, ka fituar Çmim të Tretë (Medalje të Bronztë) me 20 pikë. Mirënjohje Nderi kanë fituar studentët: Monika Bunjaku dhe Duart Nishefci”, thuhet në njoftim.

Në komunikatën për media, ndër të tjera thuhet se IMC është ndër garat më të rëndësishme botërore të matematikës për studentë universitarë, në të cilën marrin pjesë studentë nga universitete prestigjioze nga të gjitha anët e botës.

Po ashtu, për herë të parë, një detyrë e Olimpiadës IMC është propozuar nga ekipi i Kosovës, shkruajnë mediat kosovare, përcjell albinfo.ch.