Maqedonia e Veriut sot rihapi kufijtë

unsplash

Sot, më 26 qershor 2020, Maqedonia e Veriut hapi të gjitha vendkalimet kufitare. Mësohet se të huajt do të mund të lëvizin pa pengesë dhe pa detyrimin e testit dhe karantinës.

Vendimi u mor nga Qeveria të martën, mbi bazën e rekomandimeve të Komisionit për Sëmundje Infektive. Qeveria po ashtu vendosi që më 1 korrik të rihapen për qarkullim edhe Aeroporti Ndërkombëtar në Shkup dhe ai në Ohër.

Duhet theksuar se Maqedonia e Veriut gjatë muajit qershor është përballur me një rritje të ndjeshme të rasteve të reja. I lartë po ashtu është edhe numri i viktimave. Gjatë 24 orëve të fundit si pasojë e koronavirusit 6 persona kanë ndërruar jetë, ndërsa janë shënuar 150 raste të reja me këtë virus.

Numri i përgjithshëm i rasteve me COVID-19 në vend arrin në 5.595, numri i të shëruarve në 2.166, ndërsa numri i viktimave në 265.