Më 22 qershor rihapen fluturimet nga aeroporti i Rinasit

Të gjitha fluturimet nga aeroporti "Nëna Terezë" në Rinas do të fillojnë më 22 qershor.

Ministria e Infrastrukturës dhe Energjisë në Shqipëri, së bashku me Autoritetet e Aviacionit Civil, janë duke ndërmarrë hapa për rifillimin  gradual të transportit ajror.

Rivënia në funksion e transportit ajror, duke iu përmbajtur rregullave parandaluese në përhapjen e Covdi 19, duke u bazuar në rekomandimet e organizmave ndërkombëtarë të aviacionit civil dhe atyre të shëndetit publik, përcjell albinfo.ch.

“Duke mirëkuptuar e mbështetur dëshirën dhe nevojën e shoqërive ajrore që kanë skeduluar fluturime të rregullta ndërkombëtare për dhe nga Aeroporti Ndërkombëtar i Tiranës, për të nisur sa më shpejt aktivitetin e tyre, dëshirojmë të konfirmojmë se të gjitha përpjekjet po ndërmerren nga autoritetet shtetërore shqiptare për të mundësuar rifillimin e fluturimeve në mënyrë të koordinuar dhe të organizuar me shtetet partnere, me të cilat zbatojmë Marrëveshje të Shërbimeve Ajrore”, thuhet në njoftim.

Në njoftim gjithashtu thuhet se duke u bazuar në deklaratën e Komisionit Europian të datës 11 qershor 2020, ku rekomandohet heqja e kufizimeve të udhëtimit për Shqipërinë, Bosnjë e Hercegovinën, Kosovën, Malin e Zi, Maqedoninë e Veriut dhe Serbinë, duke filluar nga 1 korriku 2020 si dhe duke konsideruar angazhimet e disa shteteve të tjera të zonës Shengen për të ndjekur të njëjtën qasje, Ministria e Infrastrukturës dhe Energjisë njofton se duke filluar nga data 22 qershor 2020 do të fillojnë veprimet për operimin e fluturimeve të rregullta ndërkombëtare, në destinacionet, sipas skedulave që do të miratohen dhe komunikohen nga Autoriteti i Aviacionit Civil në vijim.

Shoqëritë ajrore duhet të bëjnë çdo përgatitje dhe të kenë gati planet e veprimit për zbatimin e detyrimeve të parashikuara në Protokollin e Operimit të Transportit Ajror, të miratuar me Urdhërin Nr.169, datë 5 qershor 2020, të Ministrit të Infrastrukturës dhe Energjisë. Ndërkaq Autoriteti i Aviacionit Civil do të monitorojë rigorozisht zbatimin e këtyre masave.

Aeroporti Ndërkombëtar i Tiranës, por edhe operatorët që do të operojnë duhet t`i informojnë pasagjerët për kufizimet e mundshme në fuqi.

“Përtej lajmit të shumëpritur për rinisjen e fluturimeve ajrore Ministria e Infrastrukturës dhe Energjisë së bashku me Autoritetin e Aviacionit Civil do të ndërmarrin çdo veprim të nevojshëm që të garantohen operimet e sigurta, eficiente dhe mbi të gjitha siguria e shëndetit të punonjësve të këtij sektori dhe ajo e pasagjerëve”, përfundon njoftimi./albinfo.ch

---