Protestë e artistëve të estradës dhe pronarëve të hotelerisë në Prishtinë

Afrim Muçiqi në protestë thotë se estrada kosovare ka pësuar dëme të mëdha

Në orën 12:00, përfaqësues të estradës, gastronomisë dhe aktiviteteve të tjera të ndërlidhura me organizimin e dasmave protestuan para qeverisë, dhe realizuan një takim me ministrin e Shëndetësisë së Kosovës, Armend Zemaj, për të shqyrtuar mundësinë e hapjes së aktiviteteve.

Ata ishin mbledhur dhe kishin dalë për të protestuar, kështu që ministri Zemaj doli para tyre dhe kërkoi që të zgjedhin përfaqësues e të takohen.

“Zgjidhni 10 përfaqësues, ejani në Ministri dhe bisedojmë sa të doni. Shihemi në takim”, tha Zemaj.

Këngëtari Afrim Muçiqi ka thënë se para se të fillojë ky kundërshtim nga ana jonë, ne dhe gastronomia paraprakisht ia kemi bërë një kërkesë Qeverisë.

“Në orën 12:00, një delegacion yni do të shkojë në takim dhe do të shohim si fillon puna, sepse është një dëm i madh. Edhe ne duhet të punojmë si gjithë të tjerët, sepse përfshihen shumë biznese, si estrada, gastronomia, dekoret etj.”, ka thënë Muçiqi para medieve kosovare, përcjell albinfo.ch.

---