Zvicër: Pandemia shton numrin e kërkesave për ushqim falas

Ata që edhe para pandemisë kishin pasur vështirësi "ta mbyllnin muajin" nga ana financiare, tani rrëshqasin shumë shpejt në varfëri

Sipas fondacionit të njohur humanitar “Schweizer Tafel”, kriza e koronavirusit ka përkeqësuar ndjeshëm situatën financiare të shumë njerëzve në Zvicër. Gjithnjë e më shumë njerëz tashmë janë të varur nga ushqimet që u jepen falas, shkruan sda.ch. Varfëria e krijuar rishtas paraqet gjithashtu sfida për fondacionin e përmendur.

Ata që edhe para pandemisë kishin pasur vështirësi “ta mbyllnin muajin” nga ana financiare, tani rrëshqasin shumë shpejt në varfëri pasi që punojnë me orar të shkurtuar ose kanë humbur punën, thuhet në një njoftim të “Schweizer Tafel”. Tashmë nga kjo preken jo vetëm individër beqarë, pa familje por gjithnjë e më shumë edhe familjet.

Në “Schweizer Tafel”, kërkesa për ushqim është rritur ndjeshëm në pika të caktuara që nga fillimi i krizës, transmeton albinfo.ch. Kjo rritje gjithashtu ka një ndikim të dukshëm në sasitë e ushqimit që dhurohet dhe në logjistikën e fondacionit

“Schweizer Tafel” mbledh ushqime atje ku ato teprojnë dhe i çon atje ku ato janë të nevojshme, përcjell albinfo.ch. Këtë e bën duke marrë ushqime nga 450 filiale të ndërmarrjeve të mëdha tregtare dhe duke i shpërndarë ato në 500 institucione sociale.

---