Kosova hyn në fazën e dytë të lehtësimit të masave

Nga sot Republika e Kosovës hyn në fazën e dytë të lehtësimit të masave kundër koronavirusit COVID-19.

 

Sipas njoftimit, thuhet se në fazën e dytë parashihet të rihapen floktarët dhe sallonet e bukurisë, stomatologët dhe fizioterapeutët, tregtarët me pakicë dhe tregjet e gjelbërta, restorantet dhe kafenetë me sistemin e sportelit, transporti hekurudhor, transporti urban dhe ndërurban me leje të veçanta, qendrat e thirrjeve telefonike me lista të stafit esencial si dhe hapja e galerive dhe muzeve.

Po ashtu, qytetarët do të vazhdojnë të dalin dy herë në ditë, nga 2 orë, sipas shifrës së parafundit në numrin e kartës së identitetit.

Nga ana tjetër, kryeministri në detyrë i Kosovës, Albin Kurti, ka thënë se faza e dytë nënkupton hapje edhe më të madhe të ekonomisë dhe rrjedhimisht edhe lëvizje të shtuar të qytetarëve, e që nënkupton edhe mundësi më të madhe të infektimit. Prandaj, sipas tij, duhet ta shtohet dyfish kujdesin.

Gjithashtu ai ka theksuar se bashkë me kalimin në fazën e dytë lehtësuese, nga sot do të ketë një plan mobiliteti me më shumë policë, me më shumë vullnetarë e më shumë inspektorë në terren.

Kryeministri Kurti ka theksuar po ashtu se deri më 25 maj do të përcillet me kujdes lakorja e të infektuarve, ndërsa nëse do të rritet numri i të infektuarve, atëherë duhet të kthehemi prapa dhe kjo do të ishte vërtet zhgënjyese pas këtij suksesi që kemi bërë.

Faza e tretë dhe e fundit nga këto masa lehtësuese që parashihet të zbatohet, do të fillojë më 2 qershor deri në një vendim të radhës dhe do të përfshijë hapjen e transportit urban dhe ndërurban, taksitë, restoranet dhe kafenetë, provimet ne arsimin e lartë, testin e maturës dhe arritshmërisë, hapjen e kinemave, hapjen e teatrove, si dhe hapjen selektive të aktiviteteve sportive.

---