Kurti në vetizolim

Kryeministri në detyrë i Kosovës e ka bërë të ditur vetë lajmin në rrjete sociale

Kryeministri në detyrë i Kosovës, Albin Kurti, është vetë izoluar, ka njoftuar ai në rrjetet sociale, përcjell albinfo.ch.

Kurti ka shkruar në Facebook se një zyrtar i Ministrisë së Integrimeve Evropiane (MIE) ka pasur kontakt të ngushtë me një nga personat e dalur pozitiv në testin për COVID-19.

“Janë marrë mostrat dhe po presim rezultatin. Unë kam pasur kontakt me të, sikurse edhe punonjës të tjerë në MIE e ZKM, ndonëse gjithnjë duke respektuar rregullat për distancën fizike. Nga sot jam në vetizolim në banesë gjersa të dalin rezultatet e testimit për zyrtarin nga MIE”, ka shkruar kryeministri i Kosovës.

Kurti ka shkruar se do t’i kryejnë punët nga largësia me përkushtimin e njejtë.

“Do t’i kryejmë detyrat nga largësia me përkushtimin e njëjtë, do t’i marrim vendimet e duhura me përgjegjësinë e njëjtë”, ka shkruar ai.

---