Studimi zviceran-kanadez: Vera nuk ndihmon kundër koronavirusit

"Mendimi se moti i ngrohtë po na vjen në ndihmë, mund të na çorientojë," paralajmëron Peter Jüni, profesor i epidemiologjisë dhe mjekësisë në Universitetin e Torontos

Që nga koha e fillimeve të para të paraqitjes së koronavirusit, ka mbizotëruar nje besim se me ngrohjen e motit, virusi do të shkatërrohet. Por, një studim serioz shkencor e konteston këtë besim.

Muajt e ngrohtë të verës duket se nuk do të sjellin lehtësimin e shpresuar në luftën kundër koronavirusit. Ky është rezultat i një studimi nga një ekip hulumtues zviceran-kanadez, shkruan srf.ch.

Studiuesit nuk kanë gjetur asnjë provë që do të dëshmonte se situata gjatë muajit mars në zonat më të ngrohta të jetë përmirësuar në krahasim me rajonet me klimë më të ftohtë.

“Mendimi se moti i ngrohtë po na vjen në ndihmë, mund të na çorientojë,” paralajmëron Peter Jüni, profesor i epidemiologjisë dhe mjekësisë në Universitetin e Torontos, njëherësh autor kryesor i studimit, transmeton albinfo.ch. Koronavirusi nuk ka nevojë për kushte të favorshme për të lulëzuar sepse njerëzit ende nuk janë imunë ndaj tij.

Një gjetje tjetër është se lagështia e lartë mund të ndihmojë në ngadalësimin e përhapjes së virusit, përcjell albinfo.ch. Por ky efekt është i vogël në krahasim me masat e mbajtjes së distancës sociale.

---