Një fije shprese në Itali: Sot kishte më pak të vdekur se një ditë më parë

“Ka më pak raste sesa ditët e kaluara, kjo të bën të shpresosh se një trend i tillë do të vazhdojë edhe në ditët në vijim, ka thënë shefi i mbrojtjes civile Angelo Borrelli

Numri i vdekjeve nga koronavirusi në Itali sot është rritur për 651, duke çuar kështu në 5.476 numrin e përgjitshëm.

Ajo që bie ne sy është se rritja nuk ishte aq e madhe sa një ditë më parë, shkruajnë mediat italiane dhe botërore, transmeton albinfo.ch.

Të kujtojmë: të shtunën, mbrojtja civile kishte raportuar numrin prej 793 vdekjeve, më të madhin  të regjistruar deri më tash në vetëm një ditë.

“Ka më pak raste sesa ditët e kaluara, kjo të bën të shpresosh se një trend i tillë do të vazhdojë edhe në ditët në vijim, ka thënë të dielën shefi i mbrojtjes civile Angelo Borrelli në Romë. Por ai ka paralajmëruar kundër përfundimeve të nxituara, përcjell albinfo.ch. “Ne nuk duhet të heqim dorë nga vigjilenca.”

Një total prej 59,138 personave të infektuar janë regjistruar në Itali deri të Dielën. Ky numër është për rreth 5500 më i madh sesa të shtunën. Por rritja këtu ishte gjithashtu më e ulët se një ditë më parë.

Sipas mbrojtjes civile, shkaku i vdekjes në mesin e të infektuarve nuk është përcaktuar përfundimisht, d.m.th nëse njerëzit kanë vdekur nga Covid-19 ose nga sëmundje të tjera ekzistuese.

---