Rritje e jashtëzakonshme e numrit të të papunëve në Austri

Sipas AMS, 16 mijë njerëz janë regjistruar si të papunë vetëm gjatë ditës së djeshme (e hënë, 16 mars 2020).

Zyra e Tregut të Punës në (AMS) në Austri ka shënuar rritje enorme të numrit të të papunëve në vend.  Sipas AMS, 16 mijë njerëz janë regjistruar si të papunë vetëm gjatë ditës së djeshme (e hënë, 16 mars 2020).

“Java do të vazhdojë të jetë edhe më e vështirë”, ka thënë Johannes Kopf, shefi i AMS, shkruan “heute.at”, përcjell albinfo.ch.

Për shkak të kufizimeve të daljes, personat e papunë mund të paraqiten në AMS me telefon ose e-mail. Linjat dhe serverët gjatë ditës së djeshme ishin të ngarkuara, por tani janë rritur kapacitetet.

Shefi i AMS, Johannes Kopf u bën thirrje të gjithëve që të mos paraqiten personalisht në AMS, njofton albinfo.ch.

Çka sjell për punëdhënësit orari i shkurtuar i punës (Kurzarbeit)

Kopf gjithashtu iu drejtohet kompanive dhe u kërkon atyre që të përdorin sistemin e “punës me orar të shkurtuar” . Kjo do të thotë që orari i punës i të punësuarve jo vetëm që mund të zvogëlohet, por edhe atyre mund t`u mundësohet të mos paraqiten fare në punë.  “Për shembull unë (si punëdhënës) nuk kam nevojë t’i dërgoj punonjësit në AMS”, ka thënë ai.

Kjo mundësi është një avantazh i madh për kompanitë të cilat nuk do të preken fare nga “lufta” me koronavirusin. Atyre u është krijuar siguri dhe stabilitet.

400 milionë euro janë në dispozicion

Qeveria rezervoi 400 milionë euro për sistemin e quajtur “punë me orar të shkurtuar”. Për krahasim: Në vitin e krizës ekonomike 2009, vetëm 113 milion euro ishin të nevojshme për punë me kohë të shkurtër.

Pra, duket se ka mjaft para. Dhe Kopf është i bindur: “Një qeveri që vepron kaq shpejt gjithashtu do të sigurojë para kur të jetë e nevojshme”.

Deri më tash numri i të infektuarve nga koronavirusi në Austri është 1.132,  ndërsa të vdekur janë raportuar 4 raste.

 

 

 

---