Haziri: LDK kërkon pushtet të balancuar, nuk heq dorë nga kryeparlamentari

Ilustrim

Nënkryetari i Lidhjes Demokratike të Kosovës, Lutfi Haziri, tha se bisedimet me Vetëvendosjen kanë zgjatur, por jo sa ka zgjatur certifikimi i zgjedhjeve të 6 tetorit.

”Pritjet kanë qenë se bisedimet do të kryhen shpejt dhe do të kemi marrëveshje me Vetëvendosjen. Sot e tutje kanë mbetur pak ditë deri më 4 shkurt, pjesa me madhe e marrëveshjes është kryer, por duhet të jetë ndarje të drejtë, sipas formulës tonë të LDK-së, të 8 janarit. Roli ynë duhet të jetë i barazvleshëm dhe se VV duhet ta shohë LDK-në pjesë të marrëveshjes”, tha ai sot për RTK.

Haziri tha se LDK-ja insiston të ketë kryetarin e Kuvendit të Kosovës. “Ne kërkojmë zbatim të marrëveshjes politike, ne e shohim kështu. Ne kemi votuar Glauk Konjufcën, pasi që ne kishim dhënë fjalën, nëse dikush ka dashur të na sprovojë, ne kemi dëshmuar atë”, tha ai.

Sipas tij, LDK-ja e ka bërë të qartë, ose shkon me VV në qeveri ose shkon në opozitë. “Zgjedhjet nuk janë zgjidhje”, tha ai, përcjell Albinfo.ch.