Sebastian Kurz bën betimin në postin e kancelarit të Austrisë

Ai arriti të formojë shumicën për të formuar qeverinë e re, falë një koalicioni me Partinë e të Gjelbërve

Politikani i Partisë Popullore të Austrisë, konservatori Sebastian Kurz, u betua të martën si kancelar i Austrisë.

Ai u rikthye në detyrë pas rrëzimit të qeverisë së tij në muajin maj, për shkak të një skandali të korrupsionit, shkruanRadio Evropa e Lirë.

Kriza politike në Austri nisi si pasojë e shfaqjes së një videoje, që supozohej se tregonte zëvendëskancelarin e atëhershëm, Heinz-Christian Strache, duke i ofruar kontrata një përfitueseje potenciale ruse, në këmbim të donacioneve politike.

Austria është udhëhequr gjatë muajve të fundit nga një qeveri e përkohshme, të cilës i ka prirë kancelarja Brigitte Bierlein.

Kurz, 33 vjeç, është kryeministri me moshën më të re në botë.

Ai arriti të formojë shumicën për të formuar qeverinë e re, falë një koalicioni me Partinë e të Gjelbërve.

Në qeverinë e kaluar, Partia Popullore e Austrisë, të cilën e udhëheq Kurz, ishte në koalicion me Partinë e ekstremit të djathtë Liria.

---