Zvicra do të heqë doganën për prodhimet industriale, pritet ulje e çmimeve

Nga kjo do të përfitojnë në mënyrë të drejtpërdrejtë konsumatorët. Thënë më qartë: heqja do të ndikojë në uljen e çmimeve të shumë produkteve

Në Zvicër nuk do të ketë më nevojë të paguhet për doganimin e prodhimeve industriale. Këtë propozim ia ka kaluar Këshilli Federal (qeveria) Parlamentit. Me heqjen e doganimit, do të ulej kostoja e prodhimeve zvicerane dhe marrëdhëniet tregtare me botën do të bëheshuin më efikase, mendon Këshilli Federal, shkruan sda.ch.

Por, nga ana tjetër, me këtë ndryshim arkës së shtetit do t`i mungojnë rreth 500 milionë franga në vit, që normalisht fitohen nga doganimi i produkteve industriale, transmeton albinfo.ch. Kjo shumë, sipas qeverisë, do të kompensohet pjesërisht përmes të ardhurave tatimore shtesë.

Në momentin kur të eleminohet dogana për produktet si automjetet, prodhimet për mirëmbajtjen trupore ose pajisjet shtëpiake, pritet të përfitojnë në mënyrë të drejtpërdrejtë edhe konsumatorët. Thënë më qartë: heqja do të ndikojë në uljen e çmimeve të shumë produkteve.

Është interesante mënyra se si Zvicra heq dorë nga doganimi i prodhimeve industriale të imoprtuara, në një kohë që shumë vende në botë bëjnë të kundërtën, shtrenjtojnë taksat e doganës, shkruajnë mediat zvicerane. Fillimisht të menduara për mbrojtjen e prodhimit vendor, ndëmarrjeve vendore, taksat doganore për produktet industriale ka kohë që e kanë humbur funksionin  e tyre. Për një ekonomi të orientuar fuqishëm drejt eksportit, si ajo e Zvicrës, doganimi në fjalë kushton shtrenjtë dhe është i lodhshëm.

Ndërsa, me këtë veprim, qeveria do të shmangë kritikat që i drejtohen Zvicrës si “ishull i çmimeve të larta”.

---