80 mijë persona, të diagnostikuar me diabet në Shqipëri

Në mbarë botën diabeti po kthehet në një epidemi me 7 milionë të diagnostikuar çdo vit. Shqipëria nuk mund të mbetet pas.

Janë 80 mijë persona që jetojnë me këtë sëmundje dhe, sipas të dhënave të Institutit të Shëndetit Publik, vetëm vitin e kaluar u regjistruan 5 mijë raste të reja.

Diabeti nuk kursen as të vegjlit. Mjeku endokrinolog, Florian Toti, thotë se janë rreth 600 fëmijë të prekur, shkruan oranews, përcjell albinfo.ch.

Ka disa simptoma përmes të cilave diabeti mund të dallohet.

“Nëse prindërit vënë re te fëmijët urinim të shpeshtë gjatë natës, etje, apo nuk po shton në peshë të bëjnë një matje glicemie dhe e kuptojnë nëse ka diabet”, tha ai.

Por më i përhapur është tipi 2 që prek të rriturit. Mjekët thonë se mund të parandalohet nëse tregohet kujdes.

Një nga shqetësimet që ngrenë mjekët është mungesa e rimbursimit të fishave të matjes së glicemisë për pacientët mbi 25 vjeç.

Vitin e kaluar si pasojë e sëmundjeve endokrine, ku përfshihet edhe diabeti, humbën jetën 251 persona.

---