Austri: Nga 1 nëntori, gjobë deri në 10 mijë euro për pirje të duhanit

Herën e parë, në rast të kundërvajtjes, lokalet do të marrin një gjobë prej 2000 euro, në rast se gjenden për herë të dytë, gjobat mund të arrijnë deri në 10 mijë euro

Nga mesnata e të premtes së 1 nëntorit, në Austri ndalohet rreptësishtë pirja e cigares nëpër të gjitha restorantet, baret dhe lokalet e tjera afariste. Nuk ka përjashtim as për diskotekat dhe as lokalet “shisha bar”.

Në maj të vitit 2018 koalicioni i atëhershëm politik ÖVP – FPÖ kishte miratuar ligjin për ndalimin e duhanit. Tash, 549 ditë më vonë, ligji do të zbatohet në përpikëri, shkruan oe24.at.

Nga nesër, pirja e duhanit konsiderohet shkelje administrative dhe për këtë edhe gjobat do të jenë mjaft të ashpra. Madje jo vetëm për pronarët e lokaleve të hotelerisë, por edhe për vetë duhanpirësit, raporton albinfo.ch.

Inspektorë të shumtë nga mesnata do të jenë në aksion për të kontrolluar lokalet afariste dhe duhanpirësit nëpër lokale.

Për duhanpirësit, gjobat fillimisht do të jenë me 100 euro, në rast të përsëritjes, deri në 1000 euro.

Ndërkohë gjobat tek lokalet e hotelerisë do të jenë edhe më të ashpra. Herën e parë, në rast të kundërvajtjes ato do të marrin një gjobë prej 2000 euro, në rast se gjenden për herë të dytë, gjobat mund të arrijnë deri në 10 mijë euro.

Ligji për ndalimin e duhanit nëpër lokale të hotelerisë flitet prej afro 27 vjetësh në Austri. Deri më tash ka pasur debate të ashpra për dhe kundër ndalimit të duhanit. Megjithatë, duket se çdo gjë nga sot ka marrë fund. Duhanpirësit mund ta shfrytëzojnë këtë të drejtë vetëm deri më datën 31 tetor (sot).

 

---