Zvicra ndalon copëtimin e zogjve të gjallë

Deri tani në Zvicër është e lejuar që zogjtë “e tepërt” të copëtohen për së gjalli. Të prekur nga kjo, në të shumtën e rasteve, janë zogjtë e gjinisë mashkullore

Duke filluar nga viti 2020, në Zvicër do të ndalohet copëtimi i zogjve të pulave për së gjalli. Ky është një vendim që ka marrë Këshilli Federal dhe e ka shpallur sot, shkruan srf.ch.

Rregullores për mbrojtjen e kafshëve i është bërë një përshtatje përkatëse në këtë drejtim, thuhet në një komunikatë të publikuar nga Këshilli Federal.

Aktualisht në Zvicër është e lejuar që zogjtë “e tepërt” të copëtohen për së gjalli (procesi i “homogjenizimit, në makina përkatëse), transmeton albinfo.ch. Të prekur nga kjo, në të shumtën e rasteve janë zogjtë e gjinisë mashkullore, për faktin e thjeshtë se ata, kur të rriten, nuk bëjnë vezë!

Për jetësimin e ndalimit të copëtimit të zogjve, në Zvicër janë kompetente shërbimet veterinare kantonale.

Edhe më tutje do të jetë e lejuar mbytja e zogjve me CO2.

Sipas Këshillit Federal, një alternativë për metodën e përmendur të mbytjes pritet të dalë e suksesshme. Me metodën e përcaktimit të gjinisë së zogjve të ardhshëm që në vezë, bëhet e mundur që shumë heret, pas fekondimit të vezës, të caktohet gjinia e zogjve, përcjell albinfo.ch. Kështu vezët e fekonduara “mashkullore” do të eliminohen paraprakisht, me kohë.

---