Lojtarët e Kosovës, të lumtur pasi e mposhtën Malin e Zi

Kosovës tashmë i kanë mbetur edhe dy ndeshje deri në fund të këtyre kualifikimeve, kundër Çekisë dhe Anglisë

Sulmuesi i Kosovës, Vedat Muriqi, i cili edhe shënoi sonte në “Fadil Vokrri” ka thënë se është i lumtur me tri pikët por që ai është dashur të shënoj edhe më shumë gola

Ai ka thënë se ka pasur edhe një bisedë me trajnerin pas ndeshjes.

“Folëm, se patëm shumë raste dhe kishim mundur një fitore të thellë dhe unë kisha pesë raste të mira për shënim. Për Kombëtare është pak ndryshe dhe pata katër pesë raste. Nuk jam i zhgënjyer por jam i lumtur që shënova. Nuk bon me e diskutuar si lojtarë atë që flas me trajnerin”, ka thënë ai.

E  Benjamin Kololli, ka folur pas përfundimit të ndeshjes fituese ndaj Malit të Zi.

Ai thotë se lojtarët kosovarë sonte kanë hyrë për ta fituar ndeshjen.

“Për krejt ekipin besoj se krejt lojtarët e kanë dhënë maksimumin sepse ka qenë shumë e rëndësishme me fitu këtë lojë”, ka thënë Kololli.

“Në lojë kemi qenë më të mirë se Mali i Zi. Tash duhet të fokusohemi në ndeshjet e ardhshme dhe të mendojmë ta mposhtim Çekinë”, ka thënë Kololli.

“I kemi të gjitha mundësitë për ta mposhtur Çekinë. Kemi fituar njëherë, besoj se mund ta bëjmë për së dyti”, ka shtuar ai.

Ndëkaq, Milot Rashica është i lumtur me fitoren e Kosovës, dhe aspak i brengosur që nuk realizoi edhe përkundër rasteve që kishte sepse tha “me rëndësi fituam”.

Kosova e mposhti Malin e Zi 2-0 me golat e Amir Rrahmanit dhe Vedat Muriqit.

“Shiqyr që arritëm me shënu dy gola herët dhe patëm ndeshjen nën kontroll, nuk kemi lejuar kundërshtarin të rrezikojë, përpos të disa goditjeve me kokë”, u shpreh Rashica.

“Është dashur të shënojmë më shumë gola, por në fund kemi fituar dhe kjo është më e rëndësishme”.

“Dëshira është e madhe e të gjithëve me shënu, por kur vijmë këtu vijmë për të dhënë maksimum, s’ka rëndësi se kush shënon, gjithmonë kemi me u gëzu dhe me festu së bashku”, u shpreh ai.

“Kualifikimi i mundshëm? Ne do të shkojmë ndeshje, pas ndeshje. Një ndeshje  e rëndësishme u krye, Kemi një muaj kohë me u përgatiti për një finale tjetër nëse e fitojmë atë finale më pas mendojmë për finalen tjetër. Për momentin jemi duke menduar vetëm për Cekini”.

Amir Rrahmani është shprehur shumë i lumtur me fitoren 2-0 kundër Malit të Zi në “Fadil Vokrri” dhe që “Dardanët” e mbajtën portën e pa prekur.

“Dardanët” kanë dhuruar spektakël në stadiumin “Fadil Vokrri”, duke e mposhtur 2-0 Malin e Zi.

---