Rita Ora bëhet (ngapak) feministe

Femrat e kanë shumë më të vështirë të gjejnë veten në botën e shoubiznesit se sa meshkujt. Ajo mendon se për femrat është më e vështirë të lansojnë hite se për meshkujt

Rita Ora mendon se femrat e kanë shumë më të vështirë të gjejnë veten në botën e shoubiznesit se sa meshkujt. 24 vjeçja londineze me rrënjë nga Kosova, sado që vetë deri më tash ka pasur tre single dhe një album që kanë zënë vendin e parë në ranglistat britanike, mendon se për femrat është më e vështirë të lansojnë hite se për meshkujt.

“Pa dashur të luaj “me letrën e të qenit femër”, mendoj se për femrat gjithnjë ka qenë më e vështirë, nga çdo aspekt. Sado që ne ta bëjmë më të mirën, kësaj duket sikur nuk i jepet sa duhet rëndësi”, është ankuar Rita Ora në një intervistë për gazetën britanike “Daily Mirror”.

Më tutje ajo ka shtuar se njerëzit e marrin shumë seriozisht nocionin “feministe” “prandaj mendoj se kanë frikë ta përdorin këtë fjalë. Në industrinë e biznesit kudo janë vetëm meshkujt në krye. Për këtë arsye unë kam qenë gjithmonë e zëshme që femrat të jenë solidare në mes vete”.