Bernardin Jakaj fiton në Vjenë ndaj serbit Mitiç

Boksieri shqiptar që jeton në Austri, Bernardin Jakaj ka korrur fitoren e radhës në boksin profesionist

Në një sallë të Vjenës, të mbushur me shqiptarë, boksieri shqiptar nga Austria, Bernardin Jakaj, gjunjëzoi në ring rivalin e tij serb, Slovoljub Mitiç.

Djaloshi shqiptar fitoi me „KO“ në rundin e dytë. Kjo është fitorja e 8-të me radhë për boksierin Jakaj, në karrierën e tij si profesionist.

Që nga fillimi, Bernardini dominoi ndeshjen dhe ishte më i përgatitur për fitore. Atij i mjaftuan vetëm dy runde për ta hedhur tri herë në dysheme rivalin serb.

Goditjet e forta të Bernardinit ishin vendimtare në këtë ndeshje, në të cilën nuk i dha asnjë shans rivalit të tij.

Pas fitores, Bernardini i mbuluar me flamurin kuq e zi dhe atë austriak, falënderoj të gjithë bashkëkombësit e tij për mbështetje të vazhdueshme në karrierën e tij profesioniste, shkruan albinfo.ch.

---