Zvicër: Rritje e vogël e Bruto Produktit Vendor në tremujorin e dytë

Pas një rritjeje prej 0.3 për qind në tremujorin e dytë, parashihet që Bruto Produkti Vendor për gjithë vitin 2019 do të ketë  një rritje prej 0.7 për qind

Ekonomia e Zvicrës vazhdon të ketë rritje, ndonëse në masë të “moderuar”. Këtë trend e tregon prognoza më e re konjunkturale e realizuar nga Instituti për Hulumtime Ekonomike “BAK Economics” i Bazelit.

Pas një rritjeje prej 0.3 për qind në tremujorin e dytë të këtij viti në krahasim me tremujorin e parë, instituti në fjalë parashikon që Bruto Produkti Vendor për gjithë vitin 2019 do të ketë  një rritje prej 0.7 për qind, thuhet në një komunikatë nga Ministria e Ekonomisë në Këshillin Federal (qeverinë e vendit) .

Ndërsa për në vitin 2020 instituti BAK Economics parashikon një zhvillim më të shpejtuar, gjegjësisht 1.3%, transmeton albinfo.ch.

Kërkesa e brendshme dhe e jashtme, në përputhje me trendin në vendet tjera evropiane, ka pasur një zhvillim të dobët. Kjo ngarkon në veçanti degët e ofrimit të shërbimeve.

Konsumi privat, me plus 0.3%, ka pasur gjatë tremujorit të dytë një rritje pak nën mesataren. Ndërsa konsumi shtetëror është rritur dobët (+0.1%). Një rënie të ndieshme e kanë përjetuar investimet në pajisje (-1.0%) dhe në këtë mes është investuar më së paku në makineri.

I frenuar nga kërkesa e brendshme, përgjithësisht e dobët dhe nga eksportet e shërbimeve që kanë pësuar një rënie të lehtë (-0.2%), në tremujorin e dytë, sektori i ofrimit të shërbimeve ka pësuar një rënie të theksuar të dinamikës.

Hoteleria me plus 2.6% dhe sektori i financave me plus 0.7%, kanë shënuar sukses gjatë kësaj periudhe.

Për ndryshim nga gjendja në vendet tjera evropiane, sektori i industrisë ka kontribuuar shumë në rritjen e Prodhimit të Përgjithsëm Vendor të Zvicrës gjatë periudhës në shqyrtim.

---