Futbollistja lë Gjermaninë për Kosovën

Donika Grajqevci, futbollistja 16 vjeçare, me banim në Gjermani ka vendosur ta përfaqësoi Kosovën.

Ajo tashmë është në fazën e marrjes së shtetësisë së Republikës së Kosovës.

Donika do t’i mbrojë ngjyrat e Kombëtares së Kosovës qysh në shtator, në ndeshjen e U 19 kundër Turqisë.

Këtë informacion e ka konfirmuar edhe ambasadori i Kosovës në Gjermani, Beqë Cufaj, në faqen e tij zyrtare në Facebook, raportojnë mediat kosovare.

“16-vjeçarja Donika Grajqevci, me shkollim dhe banim në Leipzig të Gjermanisë, ka vendosur të marrë shtetësinë e Republikës së Kosovës dhe me këtë edhe të prezantojë Përfaqësuesen e Kosovës në futbollin e femrave për U 19. Talenti i Donikës dhe përkujdesja e prindërve të saj kanë qenë dhe janë faktori kryesor që Donika të përcaktohet për kombëtaren tonë- edhe pse tash luan për Jena dhe ka pasur oferta nga Kombëtarja e Gjermanisë! Donika do t’i mbrojë ngjyrat e Kombëtares së Kosovës qysh në shtator në ndeshjen e U 19 kundër Turqisë! Sukses Donikës! Falemnderit prindërve të saj”, ishte shkrimi i plotë i Ambasadës së Kosovës në Gjermani.

---