Arrestohet shqiptari i dyshuar për vrasjen e boshnjakut

I dyshuari e ka qëlluar 24 vjeçarin me dy plumba, duke i shkaktuar plagë ndërsa babanë tij 46 vjeçar e kishte goditur për vdekje

Policia e Austrisë ka kapur të premten një person 34 vjeçar, të dyshuar si autor i vrasjes që ka ndodhur ditë më parë në Salzburg. Personi i arrestuar, një shtetas shqiptar, tashmë është duke u mbajtur në burgun për hetime, ku po merret në pyetje nga policia, njofton orf.at.

Ende nuk është plotësisht e qartë nëse i arrestuari është pikërisht ai që ka kryer vrasjen, thekson policia, transmetion albinfo.ch.

“Se çfarë roli ka luajtur ky person në vrasjen e përmendur, ende nuk mund të jepen hollësi, për shkak të vazhdimit të hetimeve”, ka thënë një zëdhënëse e kontaktuar nga Agjencia e Lajmeve APA.

Në natën e 4 qershorit, para një lokali në paralagjen Lehen të Salzburgut kishte ndodhur një konflikt në mes të një boshnjaku 24 vjeçar dhe shqiptarit, tashmë të kapur, si të dyshuar.

24 vjeçari ishte duke e festuar në atë lokal ditëlindjen e të birit. I dyshuari kishte hyrë aty me ç`rast e kishte fyer dhe e kishte goditur me shuplaka, përcjell albinfo.ch.

Boshnjaku pastaj e kishte thirrur babanë e tij në lokal, duke i kërkuar ndihmë. Pas kësaj, i dyshuari e ka qëlluar 24 vjeçarin me dy plumba, duke i shkaktuar plagë ndërsa babanë tij 46 vjeçar plumbat e shkrepur nga revolja e tij e kanë goditur për vdekje.

---