Ambasadori austriak kërkon zgjidhje të krizës para sezonit turistik në Shqipëri

Ambasadori i Austrisë në Tiranë, Johann Sattler, gjatë një vizite që ka pasur në qytetin e Vlorës ka deklaruar se partitë politike duhet të gjejnë kompromis përpara sezonit turistik.

Duke iu përgjigjur interesimit të medies në lidhje me krizën politike, Sattler e vuri theksin te ndikimi që mund të ketë ajo në potencialin turistik të vendit, transmeton albinfo.ch.

“Ekziston e drejta e çdo qytetari për të protestuar. Ka ardhur koha ku përfaqësues të politikës të ulen në tavolinë e të gjejnë zgjidhje dhe jo të krijojnë probleme. Uroj që protestat të mos ndikojnë në potencialin turistik që ka Shqipëria. Uroj që drejtuesit politikë të gjejnë gatishmërinë dhe vullnetin e duhur dhe të gjejnë një kompromis para sezonit turistik. Duhen mbyllur gropat e krijuara dhe jo të hapen të tjera, ky është momenti i duhur”, u shpreh Sattler.

Më herët u raportua se po për shkak të krizës shumë rezervime të bëra nga turistët janë anuluar.