Presidenti i Shqipërisë, i shqetësuar për lirinë e medias

Presidenti i Shqipërisë, Ilir Meta, ka ngritur shqetësimin për situatën e medias në vend, në Ditën Ndërkombëtare të Lirisë së Shtypit.

Në një postim në rrjetet sociale, Meta thotë se kjo ditë e gjen Shqipërinë të renditur ndër vendet me liri të pjesshme të medias.

Kreu i shtetit shqiptar thekson se shqetësimet e thella të ngritura në raportet e fundit të “Freedom House” dhe “Reporterëve pa kufij”, për fatin e keq, vijojnë të hasin në vesh të shurdhët. Sipas Presidentit, kjo situatë duhet të marrë fund, pasi media e lirë luan rol kyç për të garantuar llogaridhënien dhe mirëqeverisjen.

“Praktikat e mohimit të së drejtës së gazetarëve për të ndjekur drejtpërdrejt veprimtarinë e autoriteteve publike duhet të ndalen. Sepse, çdo goditje ndaj institucionit të medias, është sulm ndaj demokracisë”, ka shkruar ai.