Sa persona hoqën dorë nga nënshtetësia e Maqedonisë së Veriut?

Pasaporta e Maqedonisë

Një numër i madh i qytetarëve po braktisin Maqedoninë e Veriut, si pasojë e pasigurisë dhe jostabilitetit ekonomik, social, por edhe krizës që po vijon.

Derisa një pjesë po largohen me vizë pune dhe punë të përkohshëm, një numër i madh i shtetasve po heqin dorë edhe nga nënshtetësia e Maqedonisë së Veriut, përcjell INA.

Sipas të dhënave të Ministrisë së Punëve të Brendshme, që nga pavarësia e vendit (1991) e deri më sot, mbi 30 mijë qytetarë kanë hequr dorë nga nënshtetësia, për arsye të marrjes së një nënshtetësie të shteteve të huaja, përcjell albinfo.ch.

Jozyrtarisht mësohet se ky numër mund të jetë më i madh për shkak të mungesës së regjistrimit të popullsisë, por edhe mungesës së regjistrave të MPB-së.

Por, nga ana tjetër, janë një numër i konsiderueshëm i shqiptarëve dhe komuniteteve të tjera që akoma nuk gëzojnë të drejtën e nënshtetësisë, për shkak të ligjeve të rrepta dhe refuzimit të paqartë.