VMRO: Tetë mijë maqedonas shpërngulen në Zvicër brenda vitit

“Maqedonia po boshatiset, po zhduket, po vdes”.

Kështu kanë thënë nga VMRO DPMNE mbi ikjen e qytetarëve të vendit në shtetet e Evropës.

Deputeti i opozitës maqedonase, Vllatko Gjorçev, tha se Maqedonisë i ndodh katastrofë demografike si asnjëherë më parë, sepse numri i personave që ikin nga vendi viteve të fundit është më i larti në histori, raporton alsat m, përcjellë albinfo.ch.

Ndërkaq numri i foshnjave të lindura gjatë muajit janar të këtij viti ka rënë për rreth 20% krahasuar me periudhën e njëjtë të vitit të kaluar.

Ai po ashtu ka thënë se brenda vitit nga Maqedonia për në Zvicër shpërngulen rreth tetë mijë persona, përcjell albinfo.ch.

“Kemi të dhëna nga Ambasada e Gjermanisë e cila tregon se në bazë ditore jepen 75 viza, për në Gjermani nuk janë të nevojshme viza, nuk bëhet fjalë për viza udhëtimi, bëhet fjalë për viza që jepen për shpërngulje. Zvicra thotë se në bazë mujore operojnë me 500-700 viza, po ashtu dhe në Zvicër nuk janë të nevojshme viza për udhëtim, por ato jepen për punë. Kjo do të thotë se vetëm  për në Zvicër 8000 persona ikin brenda një viti. Në Maqedoni po ndodh eksod i paparë, gjithmonë ka pasur migrim, por kjo që po ndodh për momentin është katastrofë demografike, ekonomike e paparë ndonjëherë”, ka thënë Vlatko Gjorçev nga VMRO DPMNE.