Zvicra shtyn vendimin rreth Traktatit për energjinë bërthamore

(Foto: Thomas Milot)

Këshilli Federal i Zvicrës (organi ekzekutiv) ka shtyrë vendimin lidhur me traktatin e Kombeve të Bashkuara për Ndalimin e Armëve Bërthamore deri në vitin 2020, duke hedhur poshtë thirrjet e Parlamentit për ta nënshkruar atë, shkruan swissinfo.ch, përcjell albinfo.ch.

Në një deklaratë lëshuar të mërkurën, Këshilli Federal ka thënë se do të donte më shumë kohë për të reflektuar para se Zvicra të pranojë Traktatin për Ndalimin e Armëve Bërthamore, dhe se i duhet më shumë kohë për të shqyrtuar zhvillmet e fundit ndërkombëtare dhe gjendjen e sigurisë.

Në vitin 2017 Zvicra aprovoi këtë traktat, mirëpo verën e kaluar vendosi të mos e nënshkruajë.

Kjo marrëveshje nënkupton një ndalim të qartë për armët bërthamore.

Shtetet që e nënshkruajnë nuk angazhohen të zhvillojnë, testojnë, prodhojnë, blejnë, posedojnë, grumbullojnë, përdorin apo të kërcënojnë me përdorimin e armëve bërthamore.

Përndryshe, Zvicra është një nga 122 shtetet që ka miratuar traktatin e OKB-së në korrik 2017. Rreth 70 vende kanë nënshkruar traktatin dhe 22 të tjera e kanë ratifikuar atë, e për të hyrë në fuqi traktati, duhet të bëhen 50 vende.