Për sa migracion ka nevojë Zvicra?

Të mërkurën e javës që vjen, Këshilli Federal pritet të marrë vendim nëse Zvicra do të vendosë klauzolën Ventil për të gjitha shtetet e BE-së për një vit ose jo

Ekonomia e Zvicrës ka nevojë për fuqi punëtore por nga ana tjetër, shtohen ankesat se në Zvicër po bëhet gjithnjë e më “ngushtë”. Të gjitha partitë pretendojnë se e kanë “recetën” për zgjidhje, dhe këto i kanë prezantuar edhe në emisionin e debatit “Arena” të transmetuar të premten në SRF.

Kështu, deputeti nga SVP/UDC Luzi Stamm, duke kritikuar masat mbrojtëse, (për kufizimin e numrit të të huajve nga BE) mbështet zbatimin e klauzolës ventil për të gjithë shtetasit e vendeve të Evropës.  Vetëm kjo klauzolë, sipas tij, është një sinjal kundër imigrimit të pakontrolluar. Kufizimi është mjeti i vetëm i vërtetë në këtë rast, ka thënë Stamm.

Por ndryshe mendon deputeti nga CVP/PDC Pirmin Bischof. Ai e përkrah gjithashtu klauzolën por e kundërshton përfaqësuesin e SVP-së sa u përket masave mbrojtëse. Ato janë të arsyeshme dhe vetëm duhet të përforcohen, ka thënë ai. Bischof është angazhuar po ashtu për shtimin e vendeve në shkollat profesionale për profesionet mjekësore, në mënyrë që më shumë të rinj zviceranë të orientohen për punësim në mjekësi.

Për socialdemokratët, masat mbrojtëse janë po ashtu zgjidhja e duhur në problemin e migracionit. Por ata nuk duan që të bëhet kufizimi në kontingjente i të huajve që do të vijnë në Zvicër. Zgjidhja që propozojnë ata është: Përmes investimeve në Zvicër të mbahet nën kontroll migracioni. Kështu, deputetja nacionale nga kjo parti, Jacqueline Fehr thotë se kufizimi përmes “klauzolës ventil” nuk do të ishte efektiv por do të kishte vetëm një “placebo efekt”.

Një deklarim i këtillë ka nxitur reagimin e Hans Hess nga BDP, i cili ka thënë se klauzola e përmendur, ndryshe nga placeboja, ka një efekt, si nga brenda ashtu dhe nga jashtë.

Afërsi me socialdemokratët ka treguar, çuditërisht, drejtori i Federatës Zvicerane të pPnëdhënësve, Thomas Daum. Sipas tij, klauzola ventil paraqet një frenim në rast urgjence. “Por, ne në këtë rast duhet të udhëhiqemi nga arsyeja. Kjo për arsyen se Zvicra në kontekst ndërkombëtar qëndron mirë ekonomikisht.

Dhe duke e peshuar çështjen nga të dyja anët, Daum ka ardhur në përfundim se “shfrytëzimi i këtij freri na shkakton më shumë dëm se sa dobi. Ndërkohë që Zvicra po kalon një fazë të rëndë në raport me BE-në, kjo do të paraqiste një sinjal të gabuar”.   

Të mërkurën e javës që vjen, Këshilli Federal pritet të marrë vendim nëse Zvicra do të vendosë klauzolën Ventil për të gjitha shtetet e BE-së për një vit ose jo.