Aleanca për Shqiptarët: Mbështesim marrëveshjen mes Greqisë dhe Maqedonisë

Gjithashtu vlerësojmë se çështjet e hapura mes shqiptarëve dhe maqedonasve, duhet të mbyllen sa më parë në interes të një kohezioni të brendshëm politik, si vlera dhe parime të demokracisë konsensuale duke reflektuar edhe realitetin multietnik të vendit, si realitet i pakontestueshëm politik, thuhet në deklaratën e ASH, për albinfo.ch.

Partia opozitare shqiptare Aleanca për Shqiptarët, e cila udhëheq me Vrapçishtin, Bogovinën, Gostivarin dhe ka dy deputet në parlamentin e Maqedonisë, ka theksuar për ALBINFO se deklarata e tyre rreth kushtit për ndryshimet kushtetuese është nxjerë nga kontesti. Ata mbështesin pa asnjë dyshim votën “për” ndryshimin e emrit, por në të njëjtën kohë kërkojnë që sa më parë të zgjidhen edhe të drejtat e shqiptarëve, të cilët janë garancë për orientimin perëndimor të Maqedonisë.

“Aleanca për Shqiptarët është e interesuar që në këtë fazë në Kuvendin e Republikës së Maqedonisë, të bëhen ndryshimet kushtetuese në favor të Marrëveshjes mes Maqedonisë dhe Greqisë për ndryshimin e emrit si parakusht për antarësimin e Maqedonise në NATO dhe BE. Gjithashtu vlerësojmë se çështjet e hapura mes shqiptarëve dhe maqedonasve, duhet të mbyllen sa më parë në interes të një kohezioni të brendshëm politik, si vlera dhe parime të demokracisë konsensuale duke reflektuar edhe realitetin multietnik të vendit, si realitet i pakontestueshëm politik. Shqiptarët në Maqedoni kanë dhënë kontribut të vazhdueshëm në proceset euroatlantike të Maqedonisë, përkrahën në mënyrë të unifikuar referendumin duke votuar “PËR” Nato dhe BE, deputetët shqiptar pa asnjë dilemë kanë paralajmëruar se do të votojnë edhe ndryshimet kushtetuese kështuqë me plot të drejtë meritojnë të trajtohen si kategori kushtetuese dhe jo si përqindje, sepse kanë dëshmuar gjithmonë se janë pjesë e progresit politik, dhe e kanë mbajtur kahjen perëndimore të Maqedonisë në drejtimin e duhur, duke mos lejuar ndikime ideologjike që kundërshtojnë vlerat properëndimore, për NATO dhe BE. Kompromisi i jashtëm politik me Bullgarinë dhe Greqine dhe ai i brendshëm politik ndaj kërkesave të shqiptarëve, është garancë për përshpejtimin e proceseve eurointegruese të Maqedonisë,” është deklarata e plotë e Aleancës për Shqiptarët drejtuar portalit ALBINFO.

---