Pakënaqësi në rritje me politikën ndaj të huajve

Çdo i treti zviceran ose 34 %, është i pakënaqur me këtë aspekt të politikës qendrore

Më shumë se gjysma e popullatës në Zvicër është e pakënaqur me politikën e vendit të tyre. Pakënaqësia më e madhe e tyre ka të bëjë me politiken e azilit dhe ndaj të huajve që udhëheq qeveria federale.

Çdo i treti zviceran ose 34 % është i pakënaqur me këtë aspekt të politikës qendrore. Kur të kihet parasysh se në vitin 2011 ishin vetëm 20% të tillë, shihet qartë se pakënaqësia ka shkuar  drejt rritjes. Nga ana tjetër, 9 për qind të të anketuarve online nga platforma Vimentis janë të pakënaqur me ndarjen e padrejtë të të ardhurave, kundrejt 24% sa kanë qenë një vit më parë.

Sikur ta bënte populli zgjedhjen e anëtarëve të Këshillit Federal (ministrave), Johann Schneider-Ammann nuk do të arrinte të zgjidhej. Madje, në vend të tij mund të vinte Pascal Bruderer, e cila aktualisht është deputete në Dhomën e Kantoneve nga kantoni Aargau. Ajo gëzon besimin e 34% të të anketuarve. Por, më të popullarizuarit në mesin e ministrave janë Doris Leuthard dhe Alain Berset. Të dy gëzojnë besimin e 55% të respodentëve.

Një temë tabu për zviceranët me të drejtë vote, siç është treguar edhe në këtë sondazh, ka dalë shkurtimi i pensioneve të pleqërisë. 88% të të pyeturve janë shprehur kundër këtij shkurtimi. 40 % e pjesëmarrësve në sondazh konsiderojnë se pensionet e tyre janë të sigurta. Në vitin 2011 ishin 33%.