Sot, “Sofra për kurbetqarët” në Prizren

Koncerti do të mbahet në qiellin e hapur, në qendër të Prizrenit, duke filluar nga ora 19:00

Sot në Prizren do të shtrohet sofra për mërgimtarët, ku ftohen të gjithë kurbetqarët që të jenë pjesë e mbrëmjes së sotme, në të cilën nën përkujdesjen e ministrit të Kulturës, Kujtim Gashi, në Kejin e Lumbardhit, në sheshin Shatërvan, nga ora 19:00, transmeton “Koha.net”.

Koncerti i madh për kurbetqarët organizohet nga AKV “Emin Duraku”, ndërsa për përgatitjen teknike përkujdeset Studio “Helix”, përcjell albinfo.ch.

Istref Krasniqi, drejtor i Studio “Helix”, thotë se çdo gjë është e gatshme për shfaqjen në skenë të katër SHKA-ve nga Prizreni, grupit artistik nga Kukësi dhe shumë këngëtarëve të këngës popullore.

Ministri i Kulturës, Kujtim Gashi, përveç që do t’u drejtohet mërgimtarëve me një fjalë rasti, do të ndajë mirënjohje për mërgimtarët që nëpër vite kanë dhënë kontribut të jashtëzakonshëm për vendin.

Në mbrëmjen “Sofra e kurbetqarëve” me programet e tyre do të paraqiten: AKV “Emin Duraku” si organizatore e koncertit, AKV “Lidhja e Prizrenit”, Grupi Folklorik nga Kukësi, SHKA “Dogri Yol”, SHKA “Sharski Behar” dhe shumë këngëtarë.

Koncerti do të mbahet në qiellin e hapur në qendër të qytetit të Prizrenit, duke filluar nga ora 19:00.

“Sofra e mikpritjes për kurbetqarët” organizohet me ndihmën e Ministrisë së Kulturës.