Zviceranët që “mbajnë gjallë” një komunë shqiptare

Në dhjetëvjetorin e saj, shoqata “Pro Kallmet” këtë të shtunë, më 24 nëntor organizon një koncert humanitar me këngëtarë nga Opera e Cyrihut

Në Obersingenthal të kantonit Aargau vepron një shoqatë humanitare që i është dedikuar ndihmave të orientuara drejt një komune fshatare shqiptare. Shoqata “Pro Kallmet” pra, siç e tregon dhe emri, grumbullon në Zvicër ndihma për t`i dërguar ato në komunën e vogël Kallmet të rrethit të Mirditës, në Shqipëri.

Këtë fundjavë “Pro Kallmet” shënon 10 vjetorin e themelimit të saj.

“Ne kemi nevojë për 60.000 deri në 100.000 franga në vit. Vetëm kuzhina që u ofron supë të ngrohtë fëmijëve bonjakë na kushton 31.000 franga”, thotë themeluesi dhe udheheqësi i shpqatës. Konrad Krattenmacher, për gazetën “Aargauer Zeitung”.

Por, shoqata ka ndihmuar deri më tash edhe shumë projekte të ndryshme në komunën e varfër shqiptare. Kontaktete para me Kallmetin, Krattenmacher i ka lidhur në vitin 2000, kur në Frauenfeld, ku ai punonte për Kishën Katolike, kishin ardhur për vizitë familjarë të priftit të atëhershëm të Kallmetit. 

Njëri ndër projektet e mbështetura nga shoqata është ngritja e kopshtit të fëmijëve, që vizitohet nga 50 fëmijë, të cilëve u ofrohen tri shujta të ngrohta në ditë. Për edukimin dhe lojërat e tyre kujdesen dy motra nderi.

Ndërsa një kuzhinë e ngritur nga shoqata, ushqen me një supë në ditë 50 fëmijë të mbetur pa prindër. Ajo që është veçanërisht pikëlluese është se pothuaj të gjithë këta fëmijë i kanë humbur prindërit gjatë punës së tyre të rëndë, ilegale, në Greqi ose në Itali.

Në dhjetëvjetorin e saj, shoqata “Pro Kallmet” këtë të shtunë, më 24 nëntor organizon një koncert humanitar me këngëtarë nga opera e Cyrihut. Ndërsa të dielën, më 25 nëntor mbahet mesha familjare. Ndihmat që priten të grumbullohen gjatë koncertit do të përdoren për ngritjen e një biblioteke shkollore.

Si koncerti ashtu edhe mesha, mbahen në Kishën katolike Nussbaumen.