Aktivistët zviceranë: “Trump nuk është i mirëpritur!”

Aktivistët në një kodër në Zvicër kanë varur një pano të madhe me mbishkrimin: “Trump nuk është i mirëpritur”, në shenjë proteste kundër ardhjes së presidentit amerikan në Forumin Ekonomik Botëror në Davos, përcjell albinfo.ch.

Grupi zviceran Kampaks (Campax) njoftoi sot se ata shpresojnë që panoja të tërheqë vëmendjen, edhe pse është e vendosur në anën shkëmbore të malit pranë Sargans, larg nga Davos.

Campax shprehu shpresën se mesazhi i tyre do të arrijë te presidenti i SHBA-së, “kur fluturon mbi luginë ose gjatë shikimit të televizorit”.

Grupi përmendi një numër ankesash në llogarinë e Trump, duke thënë se ai përfaqëson “racizmin, islamofobinë, antisemitizmin, seksizmin, armiqësinë ndaj grave, luftën, mohimin e ndryshimeve klimatike, sulmet mbi të drejtat e njeriut dhe duke ndjekur një politikë që thellon varfërinë dhe pabarazinë”.

Trump ka ardhur të enjten në Davos, ku do të takohet me disa liderë dhe do të mbajë një fjalim gjatës ditës.