Athina përshëndet nisjen e punimeve për të rënët gjatë luftës italo-greke

Ka filluar zbatimi i marrëveshjes Shqipëri-Greqi për zhvarrimin e ushtarëve grekë të rënë në vitet 1940-1941.

Ministria e Jashtme greke ka përshëndetur reagimin e Shqipërisë ndaj kësaj kërkese që Athina e konsideron si “një kërkesë historikisht të drejtë” dhe si një shenjë që “dialogu me frymë konstruktive mund të shpjerë në zgjidhje të problemeve”, përcjell albinfo.ch.

Në një deklaratë të publikuar paraditen e të hënës, Ministria e Jashtme greke e cilëson nisjen e zhvarrimit si një “hap të rëndësishëm që përfundimisht të prehen shpirtrat e ushtarëve grekë të rënë në luftën italo-greke të viteve 1940-1941”.

Në deklaratë theksohet se Ministria e Jashtme do të vazhdojë të punojë me përgjegjshmëri dhe seriozitet për garantimin e interesave kombëtare, duke kultivuar rregulla të fqinjësisë së mirë dhe kushte dialogu, gjithmonë në dobi të ndërtimit të së ardhmes së përbashkët evropiane që meriton rajoni ynë.