Hekurudhat e mjerueshme të Kosovës

Hekurudhat e Kosovës vazhdojnë të jenë në gjendje të mjerueshme infrastrukturore. Ato gati janë bërë të pakalueshme për shkak se treni lëvizë rrallë e në disa nuk lëviz fare

Hekurudhat në Kosovë vazhdojnë të jenë në gjendjen e mjerueshme, pasi nëpër shumicën e hekurave nuk qarkullojnë trenat. Ato tani duken si fosile nga shekulli kaluar, ndërsa edhe qarkullimi me tren është shumë i rrallë, pavarësisht kostos shumë të lirë. Aktualisht nëpër hekurudhat e vendit qarkullojnë trenat në dy relacione, Prishtinë – Pejë dhe Fushë-Kosovë -Shkup. Po ashtu edhe një tren vjen nga Beogradi drejt Mitrovicë.

Rtk ka sjell një fotografi nga hekurudha e cila kalon nëpër fshatin Druar të komunës së Vushtrrisë, që është në një gjendje jo të mirë. Aty tash e sa kohë nuk funksionon treni, semafori, ndërsa për ndalesa elektrike që ndalojnë lëvizjen e veturave, as që bëhet fjalë.

Në njërën anë është edhe objekti që shfrytëzohej si stacion për udhëtarët, por që sot është gati i rrënuar, edhe pse në anën tjetër ndodhet një vend i destinuar për stacion, i cili po ashtu nuk është në funksion. Nëpër trasenë e kësaj hekurudhe ka qarkulluar treni nga Mitrovicë për Fushë-Kosovë,  por pas shpalljes së pavarësisë edhe ky tren është ndalur.

Ndryshe, sipas Agjencisë së Statistikave të Kosovës (ASK) në territorin e Kosovës janë gjithsej 333 kilometra binarë hekurudhorë për transport dhe 110 binarë të udhëtarëve, derisa kanë qarkulluar  8 lokomotiva disel, të cilat bartin 27 vagonë, 9 të udhëtarëve dhe 18 për bagazh.

Qytetarët e Kosovës më shumë e kanë shfrytëzuar aeroplanin për flurime jashtë vendit se sa udhëtimet me tren brenda Kosovës. Madje dallimi është dukshëm më i lartë, duke kaluar shifrat në 8 ose 9 fish më shumë me aeroplan se sa me tren, transmeton albinfo.ch.