Osmani nga Athina porosit se ky vit është shans historik për emrin

Zëvendëskryeministri i Maqedonisë, Bujar Osmani, është takuar me zyrtarë të Greqisë në Athinë, në përpjekje për ta zgjidhur kontestin e vjetër më tepër se dy dekada lidhur me emrin e Maqedonisë, përcjell albinfo.ch.

“Ne jemi të përkushtuar për të gjetur zgjidhje në këta gjashtë muaj”, tha Osmani, pas bisedimeve të djeshme dhe ka shtuar se “2018-ta është vit i artë për mundësinë për vendin tim që të bëjmë progres në kuptimin e integrimit euro-atlantik”.

Ky takim u bë para rundit të ri të bisedimeve të ndërmjetësuara nga Kombet e Bashkuara, ndërmjet negociatorit maqedonas, Vasko Naumovski, dhe atij grek, Adamantios Vasilakis, që pritet të mbahet më 17 janar në Nju Jork.

Greqia nuk pajtohet me emrin e fqinjit të tij, prej pavarësisë së Maqedonisë në vitin 1991, duke argumentuar se ky emër paraqet pretendime territoriale në disa pjesë të Greqisë, që e kanë po këtë emër.